Utveksling
i München
Hei!
Eg heiter Hanna og skal begynne på mitt 5. år på integrert master i by- og
regionplanlegging. Eg har vore så heldig å få reise på utveksling to gongar.
Hausten 2023 studerte eg på Sardinia i Italia, og våren/sommaren 2025 ved TUM i
München, Tyskland. Desse utvekslingsopphalda har vore ganske forskjellige, men
begge like innhaldsrike og lærerike på kvar sin måte.
München
er ein kjempefin by med store parkar og flotte gater. Det er lett å sykle
rundt, og det finst mange koselege kafear og biergartens. Englischer Garten er
ein av dei største byparkane i verda, og det er ikkje uvanleg å sjå folk surfe
i elva midt i byen. Byen har òg eit rikt kulturliv med konsertar, museum og
festivalar gjennom heile året. Samstundes er det kort veg til Alpane, så det er
lett å ta dagsturar til fjells for å gå på ski eller vandre.
Med Deutschlandticket, som kostar 38 euro i månaden for studentar, kan ein reise så mykje ein vil i heile Tyskland med kollektivtransport. Eg nytta dette mykje, særleg til å dra på fjellturar i helgene. Det var enkelt å hoppe på toget og reise til nye stadar utan å tenkje på billettar kvar gong. Ein kunne til og med reise heilt til Salzburg i Austerrike med same billett.
Eg
meldte meg òg på eit fadderprogram som heitte Party Animals. Dette var veldig
kjekt, og ein fin måte å bli kjent med andre internasjonale studentar på. Vi
blei plasserte i grupper med fadrar, litt på same måte som i Noreg. Gjennom
opplegget fekk vi vere med på mange sosiale aktivitetar, som festar,
byvandringar og tur til Alpane, noko som gjorde det lettare å kome inn i det
sosiale miljøet og finne vener frå heile verda.
Technische
Universität München (TUM)
Technische
Universität München er eit velkjent universitet i Tyskland og internasjonalt,
med over 50 000 studentar. TUM har hovudcampus i München, med satellittcampus i
Garching, Freising, Heilbronn og til og med Singapore (TUM Asia).
Eg
blei plassert under fakultetet for landskapsarkitektur som høyrer til i
Freising. Det har vore både lærerikt og utfordrande. Å studere
landskapsarkitektur på masternivå når ein eigentleg studerer by- og
regionplanlegging, byr på nokre utfordringar.
Fag
og emne
Eg
tok to fag ved TUM – eitt i Freising og eitt i sentrum.
Masterprosjektet
Landscape Architecture and Public Space var eit 15-poengsemne som hadde
mange likskapstrekk med masterprosjekta ved NMBU. Arbeidet gjekk føre seg i
grupper på fire til fem studentar, der vi saman utvikla eit prosjekt frå
analysefase til ferdig design. Resultatet skulle presenterast gjennom A0-plakatar
med visuelle illustrasjonar, supplert av ei skriftleg mappe på 10–12 sider som
utdjupa og forklarte prosjektet i detalj.
Eg
tok òg eit 8-poengsemne i tysk. Sjølv om eg hadde litt forkunnskapar frå før,
hadde eg gløymt det meste. Difor var det nyttig å få ei grunnleggande innføring
for å friske opp att grammatikken. Faget minna mykje om undervisninga ein hadde
på ungdomsskulen og vidaregåande, meir som eit «klasseromsfag» der ein øver
mykje på munnleg deltaking i timane. Læraren var svært dyktig, og det gjorde
faget både lærerikt og kjekt.
Personleg
utvikling
Utveksling
er noko eg verkeleg vil anbefale alle! Eg har lært mykje om meg sjølv, blitt
meir sjølvstendig og tryggare på eigne evner. Eg har utfordra meg sjølv, både
sosialt og fagleg, og lært å tilpasse meg nye situasjonar.
Bustad
Eg
og kjærasten min leigde ei lita leilegheit rett ved Olympiaparken i München. Vi
betalte 700 euro kvar i månaden, noko som faktisk er ein rimeleg pris med tanke
på at München er ein dyr by. Det var fint å bu så nærme parken, og samtidig
ikkje langt frå sentrum. Og et ekstra pluss med nydelege solnedgangar frå
Olympiaparken.
Språkutvikling
Eg
hadde noko grunnleggande tyskkunnskap før opphaldet, men merkar tydeleg at eg
har blitt betre. Mykje av undervisninga gjekk føre seg på engelsk, men i mange
kvardagssituasjonar var det greitt å kunne snakke og forstå litt tysk. Det gir
ei ekte meistringskjensle å forstå og bli forstått på eit nytt språk!
Oppsummert
Eg
angrar ikkje eit sekund på at eg har reist to gongar på utveksling – og eg
oppmodar verkeleg andre studentar til å gripe den moglegheita!
Var
det vanskeleg å få dei emna du ønskte å ta?
–
Tysk som emne var veldig populært. Derfor meldte eg meg opp på emne med ulike
tidspunkt og nivå for å sikre at eg fekk plass på eit av kursa. Dette blei eg
anbefalt av ein «buddy».
Fekk
du godkjent alle emna dine då du kom heim?
–
Ja.
Er
du nøgd med den faglege kvaliteten på universitetet?
–
Den faglege kvaliteten på universitetet er svært god.
Kor
langt rakk midlane du fekk frå Lånekassen/Erasmus-stipend?
–
Sjølv om at vi hadde litt dyr leige, klarte eg meg greitt med midlane frå
Lånekassen og Erasmus-stipendet. Som Erasmus-student kan ein eigentleg leve
meir komfortabelt enn vanleg, fordi ein får ekstra stipend gjennom Erasmus+.
Oppnådde
du det du ønskte ved å dra på utveksling?
–
Absolutt!
Stikkord:
Tyskland, München, TUM, Landskapsarkitektur, Master, By- og regionplanlegging
Comments
Post a Comment